82ویں فارمیشن کمانڈرز کانفرنس: ’غیور پاکستانی عوام پرعزم اور متحد رہیں‘ – Pakistan

آرمی چیف جنرل سید عاصم منیر کی زیرِ صدارت جی ایچ کیو میں 82ویں فارمیشن کمانڈرز کانفرنس منعقد کی گئی جس میں ملکی داخلی اور خارجی سیکیورٹی صورتحال پر تفصیلی تبادلہ خیال کیا گیا۔

کانسفرنس میں مسلح افواج کے افسران، جوانوں اور عوام کو زبردست خراج تحسین پیش کیا گیا۔

کانفرنس میں فورم نے اعادہ کیا کہ ’پاکستان کو غیر مستحکم کرنے کے لیے دشمن قوتوں کے اشارے پر کام کرنے والے تمام دہشت گردوں، ان کے سہولت کاروں اور ان کی حوصلہ افزائی کرنے والے عناصر کے خلاف ریاست مکمل طاقت کے ساتھ نمٹے گی‘۔

کانفرنس کے شرکاء نے بھارت کے غیر قانونی طور پر مقبوضہ جموں و کشمیر میں کشمیریوں پر جاری جبر و استبداد پر تشویش کا اظہار کیا اور بھارتی فورسز کی طرف سے انسانی حقوق کی مسلسل خلاف ورزیوں کی مذمت کی۔

فورم کا کہنا تھا کہ ’پاکستان کشمیریوں کی سیاسی، سفارتی اور اخلاقی حمایت جاری رکھے گا‘۔

فورم کا کہنا تھا کہ ’مسئلہ کشمیر کا دائمی حل صرف اقوام متحدہ کی قراردادوں کے مطابق کشمیریوں کو حقِ خود ارادیت دینے میں ہے‘۔

فورم کی جانب سے جاری اعلامیے میں کہا گیا کہ ’پاکستان فلسطینی عوام کی مکمل سیاسی، سفارتی اور اخلاقی حمایت کرتا ہے‘۔

فورم نے مسئلہ فلسطین پر پاکستان کے اصولی موقف کا اعادہ کرتے ہوئے کہا کہ ’پاکستان فلسطین کے مسئلے پر دو ریاستی حل، جس کی بنیاد 1967 سے قبل کی سرحدوں پر ہے اور جس کا دارالحکومت القدس شریف ہے، اس کی مکمل حمایت کرتا ہے‘۔

اعلامیے کے مطابق ’درپیش چیلنجز کے باوجود گزشتہ کچھ مہینوں میں پاکستان میں اضطراب اور غیر یقینی صورتحال میں کمی ، جبکہ امید، اعتماد اور استحکام میں اضافہ نظر آیا ہے‘۔

فورم نے اِس بات کا اعادہ کیا کہ ’ذاتی مقاصد کے حصول کی خاطر مایوسی پیدا کرنے والے مخصوص عناصر کی کوششوں کو ثابت قدمی اور جاری شدہ مثبت اقدامات کے تسلسل کے ذریعے پاکستانی عوام کی مکمل حمایت کے ساتھ شکست دی جائے گی۔‘

کانفرنس کے شرکاء کا کہنا تھا کہ ’پاک فوج پائیدار استحکام اور سلامتی کے سفر میں قوم کا دفاع اور خدمت جاری رکھے گی‘۔

فورم کے اعلامیے میں یہ بھی کہا گیا کہ ’غیور پاکستانی عوام پرعزم اور متحد رہیں‘۔

کانفرنس میں ’معیشت کی پائیدار بحالی، اسمگلنگ، ذخیرہ اندوزی، بجلی چوری، وَن ڈاکومنٹ رجیم کا نفاذ، غیر قانونی غیر ملکیوں کی باوقار وطن واپسی اور قومی ڈیٹا بیس کی حفاظت سمیت غیر قانونی سرگرمیوں کو روکنے کے لیے مختلف شعبوں میں حکومتی اقدامات کی مکمل حمایت کی گئی‘۔

کانفرنس سے خطاب میں آرمی چیف نے ابھرتے خطرات سے نمٹنے کے لیے فارمیشنز کی آپریشنل تیاریوں اور تربیت کے اعلیٰ معیار پر اِظہار اطمینان کیا۔

#82ویں #فارمیشن #کمانڈرز #کانفرنس #غیور #پاکستانی #عوام #پرعزم #اور #متحد #رہیں #Pakistan

Leave a Comment

Your email address will not be published. Required fields are marked *

Scroll to Top